英式生活又點少得食下午茶　百年老店Fortnum & Mason

作者：高力木

自細我哋喺香港都成日去茶餐廳食下午茶，雖然通常份量少啲，但勝在價錢平，不過原來加咗「英式」兩隻字就完全變咗第二樣嘢。

英式下午茶Afternoon tea，以前係由啲英國上流社會發明（諗下都知窮人日日要打工，邊可能三四點同你慢慢嘆茶），啲貴婦阿太一邊飲住靚茶再享受住三層架上面嘅精美點心，成個畫面真係好高級。來到現代，要學貴族食個Afternoon tea亦所費不菲，你永遠唔會明白三文治、scone（英式鬆餅）同埋甜品點解可以價值幾十鎊。

或許英國喺疫情期間經濟真係好差又無哂遊客嘅關係，連皇室都幫襯嘅老字號百貨公司Fortnum & Mason都要為佢個出哂名嘅茶室The Diamond Jubilee Tea Salon推出買一送一優惠救亡，於是喺非自願嘅情況下，小弟就去咗試下佢個Afternoon tea。

佢有幾款下午茶餐揀，價錢由£60起，小弟就揀咗最傳統嘅Afternoon Tea Set，可以任飲任食茶點。最後總共試咗三款茶，分別係Queen Anne、Afternoon Blend同埋Jubilee，作為一個平時只會去茶樓飲普洱嘅人，好唔好飲我就唔識分，佢有整埋個茶隔等你唔使飲到茶葉，感覺上啲茶葉係高級嘅，女友試咗日本綠茶都有驚喜。

而三層架就由最低層講起，三文治食落唔錯，麵包都幾軟熟，有三文魚、青瓜、火腿、雞蛋同加冕雞五款。

至於中層主角scone就有原味同提子兩款，當然唔少得有clotted cream同埋士多啤利檸檬兩款果jam畀你搽。

最頂層就有幾款甜品，不過不失啦。

食完三層嘢後，最後一人可以揀一款蛋糕，食咗朱古力蛋糕唔錯，海綿蛋糕就一般。

講下服務方面，一坐低時都幾好招呼，有幾個waiters輪住服務，食完三文治都主動問要唔要添食，但到後來唔知係唔係太忙嘅關係，啲茶飲哂好耐都未有人過嚟問下（由於英國唔興舉手叫waiter，只可以用眼神攻擊），即時扣哂分。

就係咁，基於香港人乜都唔好執輸嘅性格，我哋臨走食唔哂就打包埋幾件餅（講下笑，其實個個人都拎，唔好浪費食物）。最後埋單兩個人£75（連12.5%服務費），值唔值就見人見智了，畢竟小弟層次低仲未學識食環境，下次都係預我去食炸髀紅豆冰好了。