作者：高力木
最近小弟經常受到噪音困擾，每朝早上八點幾，總會有音樂從窗外傳來，歷時近兩小時，星期一至五影響在家工作，星期六日影響睡眠，而最頂癮的是，播來播去都只係重複幾首輕快嘅手風琴音樂，聽十分鐘就可能覺得過癮，再落嚟就變咗煩厭。
因為咁，小弟去搵咗啲關於噪音管制嘅資料，發現法例只限制晚上十一點至早上七點唔可以發出多過34分貝嘅噪音或者多過背景噪音10分貝，如果有呢啲情況，你可以向council作出投訴，council調查後如果證實到有人喺呢段時間發出噪音，就會向該人士發警告信，再無改善的話就可以起訴佢。
顯然呢條法例保障唔到我呢個情況，而早幾日終於有鄰居頂唔順上咗當區居民facebook group出post呻下。
不出所料有好多鄰居即時附和，其中一個仲好啜核咁話好enjoy啲音樂，合埋眼以為自己去咗巴黎咁話！小弟真係唔識分佢係真心定係表演緊英式幽默。
唔知係唔係有人發現咗自己畀到麻煩人哋，呢兩日朝早都無再聽到啲音樂，似乎post上facebook呢招真係幾work!
不過講到尾，其實最嘈的，非警車、消防車與救護車聲莫屬，喺度對怕嘈嘅朋友奉勸一句，有得揀都係唔好住近大街或者警署、消防局同醫院喇！
