作者：明思
相信大家都知道，英格蘭又即將（11月5號起）再次進入封城(Lockdown)狀態，為期一個月。政府甚至已經放風，話如果疫情冇改善，好大機會封城會再延長至聖誕之後。呢個消息引起咗好多英國人不滿，皆因喺西方社會，聖誕節係最最最重要嘅節日，冇得開Party又冇得返屋企探親朋好友，對佢地嚟講特別難受。
雖然小編我嘅屋企人都喺晒香港，但封城令我連街都冇得出，朋友亦都冇得見，都十分難過；更甚嘅係屎忽痕搵返電話啲舊相嚟睇，令我醒起原來聖誕節期間嘅倫敦係咁多嘢玩咁精彩，實在令我好掛住…
Hyde Park Winter Wonderland
位於海德公園嘅Winter Wonderland係小編每年必到嘅地方之一，佢好似加強版AIA嘉年華咁，有機動遊戲、攤位遊戲、市集、現場表演、餐廳酒吧等等…每年11月中至1月頭就出現喺Hyde Park。
Winter Wonderland喺十幾年前開始，據說初初唔係太成功，後尾慢慢試吓加唔同嘢擴大版圖，由德國啤酒節式嘅酒吧到唔同嘅Live Show都有，仲要唔收入場費，即使你唔玩，入去感受下氣氛都十分正，係每一個倫敦人冬天都必去嘅地方！
好可惜嘅係由於肺炎關係，今年嘅Winter Wonderland已經宣佈會停辦，想去嘅就要等到2021年喇。
Christmas Market 聖誕市集
聖誕市集源於德國，但到今時今日，英國又點會無丫。
雖然喺英國嘅市集未必及得上歐洲其他國家咁盛大，而喺倫敦嘅可能又再比相對出名嘅愛丁堡／伯明翰聖誕市集遜色，但座落於Leicester Sqaure及Southbank等地、每年12月開始嘅Christmas Market都為聖誕帶來唔少氣氛㗎！
除咗有唔同嘅手工藝及聖誕相關嘅產品出售外，仲有好多美食好似德國香腸Wurst及西班牙油條Churros咁，更加唔少得Mulled Wine熱紅酒啦！佢以葡萄酒作為原料，配上其他香料煮熱，喺聖誕凍冰冰時揸住慢慢嘆真係身又暖心又暖，今年睇嚟只可以喺超市買返屋企自己整了！
Ice Skating 溜冰
每逢冬天11月開始到1月，喺英國唔同嘅地方就會開始有好多快閃(Pop-up)嘅戶外溜冰場，以倫敦為例，金融中心金絲雀碼頭(Canary Wharf)、傳統英式大宅薩默塞特府(Somerset House)、Queen's House等等地方都會化身成溜冰場，比大家喺冬天嘅氣氛及燈光底下作另類感受。雖然小編就覺得價錢都唔平，平均一節45分鐘就要十幾鎊，但咁特別嘅體驗都要去試返一次半次啦！
落筆之時部份溜冰場已開放比公眾，但相信封城底下亦都無法繼續營業，大家有興趣記得密切留意返相關網頁，睇吓解封後幾時開返可以去享受下啦～
