從回憶上路　慢步倫敦Mayfield Lavender薰衣草田

作者：大糖菓子

搬咗黎英國後，每年夏天都會探訪薰衣草田。倫敦近郊嘅Mayfield Lavender就滿足晒我三個願望，漫步花田薰衣草香味撲鼻，品嚐薰衣草雪糕啖啖奶香，同埋購買各類薰衣草產品。

位置方便 自駕或公共交通工具都係一小時左右就到達

由於呢個薰衣草田位置方便，自駕同埋搭公共交通工具都得，所以一向都備受旅客同當地人追捧。

Mayfield Lavender Farm
1 Carshalton Rd, Banstead SM7 3JA
入場費£4，16歲以下兒童免費

自駕：直接輸入Postcode SM7 3JA，憑入場劵免費泊車

公共交通工具：由Victroia Station出發，乘火車到West Croydon站轉乘166號巴士到閘口

紫色花海 一望無際 超級治癒～

通常薰衣草都係七月至八月盛開，所以花田都係呢兩個月開放。呢個薰衣草田都幾大，一望無際嘅紫色花海，真係好治癒。入場後沒有時間限制，所以可以隨心周圍影下相，然後買杯薰衣草特飲同雪糕，坐低望住花海慢慢品嚐。有麝自然香，有花香自然會引來蜜蜂，提一提大家呢度係有大量蜜蜂出現，不過佢地都係圍住薰衣草飛，唔需要太過擔心，如果影相時候有蜜蜂接近，慢慢行開就可以。

Mayfield會令遊客感受到一片英國風，入口位置放置左一個英國經典紅色電話亭，值得排隊影。我上一次黎嘅時候係威廉王子同凱特大婚之年，響薰衣草田上面發現兩位皇室嘅節日限定紙牌，有緣同佢地合照一張留念。園內亦有兩個私人小涼庭(private gazebos)，可以預約派對，亦提供小食同英式下午餐選擇。

臨走前可以行下商店，價格唔算便宜，但林林總總嘅薰衣草產品很難抗拒，一定會買到心頭好。我買過薰衣草製嘅潤膚膏(Organic Lavender Hand & Body Lotion 250ml £10)，冬天用非常滋潤，亦香味十足。店內亦有賣唔同薰衣草品種嘅香薰油(Organic English Lavender Oil 5ml £5)，可以考慮將薰衣草嘅香味帶返屋企。另外推介一下茶包，有幾種味道包裝精美，我就情有獨鍾薰衣草加伯爵茶(Lavender & Earl Grey Tea Bag 15個 £4.5)，配埋牛油酥餅(Lavender ShortBread Biscuits 150g £4)就滿分。