作者：西域以西
話說小弟有一日睇到個咁嘅樓盤廣告。嘩，東倫敦Zone3兩房單位£315,000咁筍？
事關今年二月嘅時候，小弟都曾經想買同一棟大廈嘅另一個差唔多大細嘅單位，仲傾好咗價錢，而當時嘅價錢係£485,000。但係搞咗一排，買家都係冇辦法出示到消防證明 （EWS1，係因應Grenfell Tower火災後新推嘅，主要係檢查大廈外牆cladding）。最後銀行唔肯承做按揭，交易亦都告吹。
即係呢個單位標價足足比巿價平咗三成幾！於是我就撳咗入呢個廣告度睇，原來係以拍賣形式賣樓，出廣告嘅時候距離拍賣日唔夠三個星期，仲要話到明係cash buyer preferred。小弟推測有以下兩個可能性。
- 賣家好等錢洗或者要換樓，已經等唔切消防檢查證明，寧願用拍賣嘅形式放盤，賣到幾多得幾多。
- 賣家已經知道消防檢查未必過到，然後外牆物料要換，要全幢大廈嘅業主夾錢，可能好貴。於是就睇吓搵唔搵到唔使做按揭可以做full pay嘅買家頂手。
平就係平，但係有好大代價，事關喺英國如果係以拍賣形式買樓，所有嘅文件（可能有幾百頁）都可以向拍賣行索取。但係如果係full pay，就冇銀行幫你檢查細節，經紀又係傾向報喜不報憂，有問題都未必會查到出嚟。
所以我會建議，如果要喺英國買樓，都係要搵人睇過晒啲細節先好，尤其係要小心啲cash buyer only/preferred，否則上錯賊船，就好難甩手，真係喊都無謂啦！
