作者：明思
最近小編成功喺英國郵寄申請攞返香港嘅強積金（MPF），知道好多朋友都想喺過嚟英國前將份MPF(s)拎出嚟，雖然今次我嘅經驗未必完全符合大部分人嘅情況，但都想分享下，比個參考大家。
背景
已居英國數年、現時持有Tier 2工作簽證，今次申請提早領取強積金的基金公司為匯豐銀行強積金。
事前準備
- 填寫表格
一共有兩份表格需要準備，第一份係強積金公司官方嘅mpf(s) w(sd2)，另一份則需要去你使用嘅強積金公司，以小編為例，匯豐銀行嘅mpf(s) w(o)表格，如果你用其他公司，去該公司搵返同一張w(o)表格就可以。
印出英文版本，填寫好表格，留空簽名及日期喺律師面前填寫。
- 搵律師見證
由於人在海外又透過郵寄申請，我需要搵一名律師作見證人，讀者可以自行搜尋「Commissioner for Oaths」，搵個方便自己又平嘅律師幫手，價錢一般幾鎊到幾十鎊都有，視乎地區而定，有啲律師逐張表格計，有啲就逐次服務計，小編今次搵嘅律師就逐次服務劃一收費£25（雖然只需要佢簽w(sd2)）。
- 寄出
將填寫好嘅兩份表格，連同喺w(o)表格「Required Document」上嘅資料郵寄返去你所使用嘅強積金公司提供嘅地址。
小編今次就連同兩份表格寄埋BRP、護照印有簽證果頁*、香港身分證及英國地址證明（銀行月結單），空郵費用約£10。
*移民證明，如外國護照或工作簽證等等。只得BN(O)或LOTR的話，未必獲受理，建議可等待申請到簽證後才辦理。
結果及所需時間
寄出四星期後收到hsbc電郵表示收到申請，再四星期後收到支票，總共約八星期。
強積金戶口內全額寄到小編香港地址（雖然小編明明填表時揀咗直接過數入銀行戶口）。
後記
雖然小編我今次嘅情況同大部份朋友希望以BN(O) Visa申領強積金不同，但希望都幫到大家。
相信喺拎到簽證後，屬於合法並長期居英國嘅大家要申請，基金都需要好強大理由先可以拒絕。
