作者：高力木
畢竟人在外國，出街食飯大部分時間都係食西餐，相信絕大部份人都難免會想喺家中煮返幾味撚手小菜食，但係英國咁大，好多時候屋企附近未必會有唐人超市，就算可以網上購物但分量買得少要畀運費又唔化算。如果咁啱屋企枝豉油又用哂，究竟去邊度買得到？
今日想同大家分享下本地超級市場你可以買到啲乜嘢亞洲食材。其實用亞洲呢個term都有啲唔係咁啱，唔好唔記得印度都係屬於亞洲，你去超級市場問職員where are asian foods，分分鐘佢帶咗你去睇印度嘢，又或者如果你上google maps就咁搜尋「asian supermarket」，個搜尋結果一定會有一大堆南亞超市，所以正確嚟講，如果想搵東南亞嘢就應該搵oriental food。
基本上你喺oriental貨架上都會搵到醬油、調味料、唔同款式公仔麵、米粉烏冬，甚至維他奶等等，其他東南亞食材好似泰式咖喱醬或者日式照燒汁都唔難搵到，小弟唔敢講話乜都有齊，但應該都可以滿足到你短期需要，小弟於lockdown期間如是挨過，至於價錢方面又唔算太貴，當然唔好同香港比啦，到得閒時先至出去唐人超市補貨都唔遲。
下次會同大家分享下唐人超市又會有啲乜嘢賣，想知就請繼續留意喇！
