作者：高力木
大多數人對英國嘅印象，相信會係又潮濕又經常落雨，小弟未嚟英國之前都有同一個諗法，又好驚冬天濕凍會凍到頂唔順。
喺講自身感受之前，由於fact check越嚟越重要，小弟決定做一個理性分析，於是乎上網搵咗英國倫敦同香港兩地嘅數據做個比較。根據英國氣象局Met office資料，倫敦由1981-2010年平均全年降雨日子為109日，而睇返香港天文台同期資料，原來平均全年降雨足足有137日，比倫敦仲多28日，認真估你唔到。
數據就講完，實際上又點呢？英國畀我嘅感覺係，即使呢一刻好天，下一刻隨時突然落雨，一日裡面可以不停出現呢啲情況，不過就算落雨經常都只會係毛毛雨，好少可會好似香港咁落狗屎，而且英國好多時候都好大風，就算開遮都無咩用，仲可能吹壞咗把遮，所以英國人都習慣唔拎遮出街，任得雨水淋頭。
而事實上呢樣嘢都有跡可尋，出名防風防水嘅乾濕褸Trench coat，就係由英國名牌Burberry個創辦人Thomas Burberry為咗第一次世界大戰英國軍人而設計，可想而知英國人對呢方面有幾重視，當然佢今時今日出名到就算賣過千鎊一件都令各位女士想擁有就梗有第二啲原因啦，由於小弟對fashion真係識條鐵，所以都係著件有帽嘅防水風褸便已足夠。
帶遮仲有樣唔好處，如果各位喜歡入球場睇波的話，最好就學英國人兩手fing fing入場，如果唔係又要預返時間過安檢，嘥咗寶貴時間啦！
