作者：高力木
剛剛喺倫敦經歷咗地獄般嘅一個禮拜，氣溫最高去到36度，仲破咗連續六日最高氣溫至少34度嘅60年紀錄，想FC嘅朋友可以睇BBC報導： https://www.bbc.co.uk/news/uk-53756412
今日想同大家分享下點解34度就要呱呱叫，你心諗，香港日日過30度啦！班鬼佬少少熱都唔挨得咁屎！我可以話你知，喺室外無錯係無香港咁熱，但喺室內就唔同講法。
首先，英國超過九成嘅屋都係無冷氣，如果你喺香港都唔開冷氣的話ok you win，最慘係而家大部分人仲working from home，日頭喺屋企真係熱到唔想做嘢。自置物業要裝冷氣唔係唔得，但閒閒地都講緊2－3千鎊，市面上亦都有得賣可攜式冷氣，價錢大約2－3百鎊，但效果當然無咁好啦，好多都會好嘈同埋要駁條氣喉出窗外排熱氣，一個夏天加埋可能熱兩星期，值唔值就見仁見智了，唔想搞咁多嘢唯有買多幾把風扇頂住當先啦。
第二，點解唔去商場舖頭行下街涼冷氣？先撇除疫症唔講，商場唔係好似香港一樣總有一兩個喺屋企附近，大部分地區只有室外retail park，即係一大個停車場側邊有好多舖頭嗰種，而且好多舖頭開咗冷氣好似無開一樣，小弟甚至去過啲舖頭仲熱過室外，真係戥啲店員慘。如果要搵有一定冷氣保證嘅舖頭就非超市莫屬，咁多凍櫃實無死。
第三，最攞命應該係呢樣－絕大部分嘅交通工具都係無冷氣，唔好以為同細個坐熱狗時差唔多，倫敦巴士嗰張絨布櫈真係好保暖，早兩日個女巴士司機連制服都唔著淨係著件吊帶衫，可想而知架巴士同蒸籠係無乜分別，而Tube除咗Circle Line、District Line、Hammersmith & City Line、Metropolitan Line仲有不斷延期尚未通車嘅Elizabeth Line有冷氣之外，其他都係依靠抽風系統排熱，撞正peak hours返工放工時間，咩情況我諗都唔使多講，為此小弟一直考慮搬屋，因為真係唔想每年夏年都要接受呢個煎熬，如果大家要搵屋都可以加入呢個考慮因素。
