作者：明思
合租屋(Flatshare/Houseshare)喺英國，特別係倫敦十分流行，一嚟係租金貴，年青人未必負擔到獨自租屋嘅開支，二嚟搵多幾個人一齊住又冇咁悶。筆者喺英國幾年都住過幾間Flatshare，與房東同住又試過，自己同朋友夾租又試過，當中有開心亦有唔開心。
綜合咗多次經驗之後反思，我覺得有幾方面係大機會與室友們產生問題或意見不合，所以想整理下小小心得，等你地可以喺租屋前協調咗先，避免之後有不愉快事件發生，處理得唔好分分鐘住到反面㗎！以下係幾方面你可以喺入住前先同室友討論，睇吓啱唔啱再決定：
作息
相信你喺屋企最多時間就係休息，返完全日工都係最想早啲返去瞓覺，星期六日放假亦想瞓晏啲，建議入住前先查詢一吓室友們嘅作息時間，由於英國嘅屋一段隔音較差，以筆者為例，我係返標準辦公室工時而室友係返夜班，有時我夜晚休息時佢先返嚟再沖涼，煮嘢食咁，會比較嘈，而我朝早返工時亦有機會嘈醒佢，影響到大家作息。
風格
好多人住Flatshare都有不同期望，有人純粹為咗一個休息空間，唔喜歡花太多時間同人交流，有人則當係宿舍咁住，渴望每日同roommates傾吓計煮吓飯仔。
筆者曾經聽過有朋友嘅室友嬲咗佢成日一個人喺房，覺得唔交流唔傾計住Flatshare好冇意思。所以為咗減少之後有不快，都係入住前講清楚會好啲。
清潔
住Flatshare，顧名思義，好多嘢都要share用，客廳、廚房、廁所(套房除外)等等。清潔問題往往係筆者自己/聽朋友分享時最易同室友們發生問題的地方：到底邊個負責清潔？幾耐做一次？室友A話佢從來唔煮飯的，可唔可以唔洗清潔？筆者建議入住前要清楚講明每一點，避免之後有拗撬，如果預算許可，甚至建議夾錢請專業清潔人員幫忙打理公共區域，以免自己清潔時，大家對「乾淨」或「已清潔完」嘅標準唔同而產生另外一啲問題。
仲有其他好多細節如添置物品、租約、使用公共地方要注意的地方等等，下集同你繼續分享！
