作者：景寧
早排英適生活出咗篇文介紹喺英國點樣買二手車，咁岩小弟近幾個月賣咗架車，可以分享下呢次賣車嘅經驗。
前因
話說早幾個月前有一日揸揸下車，發覺轉波唔係太順暢，卡住卡住咁，心知不妙，先後Google及向熟車朋友查詢，初步估計係極力子有問題，亦有可能好彩只係Engine Oil唔夠，唔好彩，嚴重的話需要成個極力子更換，又要洗一大筆。
由於心入面非常希望只係要換Engine Oil，再加上部車都年幾冇做過Service，我決定先拎架車去做個Full Service，順便檢查埋其他部份，當係準備定之後嘅MOT。
放低架車大約兩個鐘咗右就收到車房電話通知已經做完Service，基本野檢查過，亦幫我換晒偈油等等濕星野，然後就同我講極力子真係有問題，磨蝕得比較嚴重，建議我成個換過，零件加人工報價五百鎊，連埋其他維修部份Total Quote我七百鎊，我心一沉，即使我知道有部份車房收費會平少少，加加埋埋都講緊四、五百鎊，我架車年齡都較大，而且居住倫敦嘅關係，實際用途不太大，諗咗一日決定唔整，直接賣車離場。
賣車途徑選擇
一開始時我有睇過部份回收車場／網站（劏車場），廢鐵價講緊只得一百鎊左右。
由於我架車仲行得走得而且MOT未過期，我就打算嘗試以其他途徑出售。
同買車一樣，賣車都分咗大致上幾類方法：
- 私人轉讓如Facebook、AutoTrader等等：容易賣到較好價錢，但比較麻煩，經常有人白撞，例如小弟賣車時已標明所有Conditions同埋提及Clutch問題，十居其九都會再問，亦會開天殺價，十分浪費時間。
- 車房／回收二手車公司：價錢相對較差，但方便快捷，專人幫你搞晒手續。
我賣車初期曾經都用過Facebook及AutoTrader，但成效不大，而且又有好多疑似騙案聯絡我（例如提出以現金／支票買車），最後我唔想再浪費時間，直接使用其中一間較出名嘅二手回收二手車公司Webuyanycar.com。
賣車手續簡單
手續其實十分簡單，先上佢地網頁輸入車牌，會有即時估價（留意返佢地估價必定會比最後實際價錢高，純粹為咗吸引你過去先），OK的話可以即時預約分店及時間。
指定時間內帶埋車匙（最好齊兩條），Handbook及完整維修紀錄，買車時DVLA寄比你嘅V5C Form，清理好車內個人物品就可以。
到達分店時職員會先同你簡單講解，再上車簡單檢查（例如撻唔撻得著車，會否有大問題等等），佢地主要檢查車輛外觀及內籠為主，反而車身性能唔太在乎，可能因為佢地翻新再賣時點都會經過自己公司車房再維修過，所以以車輛外觀為重。
檢查時職員會一路同你紀錄返每個花痕，凹凸位，完成檢查後會向你報告每個有問題的部份，再扣減回收車價。
完成後職員會告知最終回收價錢，如果OK的話會即時進行手續，基本上職員會搞掂所有步驟，你只需簽名就可以。
錢方面，佢有唔同Options俾你選擇，如果想即時收到錢的話，可以比數十鎊手續費，馬上過戶，如果唔急可以等幾日的話，就唔洗比手續費收到全額。
嚟到呢度基本上已七七八八，你可以最後到車上檢查有否遺留物品，同架車道別後就搞掂。
後續只需記得Cancel保險，而Vehicle Tax方面，DVLA收到V5C確認買賣之後，會將你該年度餘下嘅Tax按比例出支票退還，正式完成所有手續。
