作者：高力木
話說小弟本身好多年前已經考獲香港車牌，雖然嚟到英國之後無錢買車，但係間中都會租Zipcar去啲山旮旯地方遊覽下，始終英國地大唔似香港交通咁四通八達，想去郊外都係揸車比較方便。
郵寄換牌慳錢慳出事
由於拎住香港車牌只可以頭一年喺英國揸車，之後繼續揸就要換英國牌，所以小弟都好準時咁跟足換牌程序上網拎form填，開埋支票連埋香港牌去郵局寄到英國運輸署DVLA（持有BNO毋須寄BRP及護照），唔知係唔係對英國Royal Mail太有信心關係，小弟只係揀咗平郵。官方話三星期內會收到新車牌，不過上網睇過一般嚟講一兩星期應該就會收到，所以每日都好期待地開信箱等回信，點知越等越唔對路，足足過咗三星期。我忍唔住去DVLA online chat問職員申請情況，誰不知佢話從來冇收過我張申請表，呢一下真係晴天霹靂，我諗我封信寄失了，仲連埋張香港車牌一齊石沉大海，立即想到要繼續換車牌，就要先返香港補領車牌。
捲土重來再出發
補領香港車牌其實唔難，只要填妥TD 106駕駛執照複本 /駕駛教師執照複本申請表，去運輸署排隊畀$110即時可以補領到，補領到後於是乎再次重新申請換英國車牌，今次唔敢搏決定畀多啲錢寄掛號信（Signed For），不出所料兩星期內已經收到回信，總算終於可以拎到英國車牌。
拎到車牌要核對資料
正當滿心歡喜研究緊新車牌時，發現車牌有效期竟然係由我補領香港車牌嗰日開始！明明之前睇過英國會跟返香港牌齡，正式嚟講有效期應該係由考到牌開始。而點解個日子咁重要係因為會影響到租唔租到車同埋日後買車保險費用。好多租車公司要求顧客有一年牌或更多，搞到小弟即時由合資格變成不合資格人士，十分濕滯。
住咗英國一排都知英國人做嘢比較求其，嗱嗱臨回信話佢知個有效期日子搞錯咗，又過咗幾日，DVLA職員David透過電郵同我講：「高生我哋check咗車牌資料無錯到，如果你認為錯的話請提供由香港運輸署發出嘅證據」，聰明的我立刻搵返考牌張黃紙再問David能否以此作為證明，點知佢都話唔得，只接受香港運輸署發出嘅駕駛執照細節證明，結果我又需要返香港填好TD 320駕駛執照細節證明申請書，再度付出$160畀香港運輸署去證明我幾年前已經考到牌。故事去到呢度已經係尾聲，最後send哂啲文件過去佢就幫我改返個日子，事情前前後後足足擾攘左一年。
香港續過牌都可能出事
後來聽返朋友講，如果喺香港曾經續過牌都可能出現錯日子呢個情況，同樣地DVLA只會拎你最新嗰張車牌嘅續牌日期嚟做有效期，咁樣隨時蝕咗十年經驗或更甚，所以穩陣起見小弟都係建議喺香港運輸署申請咗駕駛執照細節證明，連埋車牌一齊寄去換牌就萬無一失啦！
車牌另有用途
題外話，車牌係可以當ID card用，事關英國係無身分證呢樣嘢，當要核實年齡好似買煙買酒，或者核實身分好似網上購物後到實體舖拎貨時（稱為click and collect），都需要用到ID，講個笑話，小弟上次去超市買枝煮餸用嘅紹興酒都畀人check ID…而車牌除咗有你個樣之外仲有哂個人資料，連住址都有，雖然好似我哋呢啲外國人擁有BRP亦可以當ID card用，但係如果整唔見咗BRP係非常之咁麻煩，隨時入唔到境，所以你可以選擇留低張BRP喺屋企而只係袋住車牌出街，至少補領車牌簡單啲。
希望我嘅經歷可以令大家換車牌時免卻好多麻煩啦！
