作者：明思
上次同大家講完好多住flatshare要注意嘅事項，相信如果大家有意住flatshare嘅話，搜尋資料時都會發現與房東同住與否都係一大考慮。
如果大家搵屋時，見到live in landlord即代表與房東同住，相反live out landlord則代表房東並唔會同租房同住，可以留意一下～筆者咁啱兩種都有住過，可以同大家分享一下分別。
「家」的感覺
由於間屋係由房東擁有，所有傢俬、擺設都由佢決定，而間屋亦好自然有一種強大的「屬於」房東嘅感覺，令租客好容易會有種寄人籬下嘅感覺。
特別係房東一家喺廳食飯，或者有朋友探訪喺廳傾計時，我都會有種打擾人地嘅feel，變咗成日屈喺間房，冇乜「家」的感覺。
房東比較上心
上面講到間屋係房東嘅「家」，佢會緊張啲亦係非常合理。由大小維修到清潔，好多房東都會自己處理好，有咩壞咗要整同佢講聲就有人搞掂晒，相反如果係live out landlord可能要派個技工嚟檢查，再約人處理，你夾喺中間會麻煩啲，時間又會再耐啲。
另外，如果喺屋企同房客有咩紛爭，又或者某個房客有啲咩問題（如非常污糟，或成日製造噪音），房東喺度住亦會切身體會到，自然會處理咗佢，你自己唔洗出手，免卻麻煩。
規矩較多？自由度或受影響
同live in landlord住喺佢「家」入面，規矩一般都會多啲，可能公共空間佢劃咗位置比你放嘢係咁多就咁多，啲野唔記得收返埋佢都會唔高興；筆者亦聽過房東要求住客十點後唔可以洗衫，甚至係因為房東係素食者而廚房唔比煮肉類等等，有機會有好多奇怪rules～
另外，筆者亦試過向房東查詢可否帶朋友返嚟煮晚飯，亦被房東拒絕，相反如果不與房東共住，自由度就會大好多，間中搵朋友返屋企聚餐，只要提前同室友講聲一般都唔會有問題。
綜合以上幾點，喺搵flatshare前記得考慮清楚啦！
