作者：明思
接續上集未講完嘅合租屋(Flatshare/Houseshare)注意事項嘅經驗分享：
添置物品
如果係由房東出租並同住嘅房間，大多數房東都會提供廚具等等比公家用，但如果係幾個朋友夾租一齊住嘅話，通常都要再另外添置。筆者建議最好大家傾好邊啲嘢想一齊買，邊啲嘢自己用，避免之後喺物品使用同夾錢上面出現麻煩。
筆者就曾試過同室友夾錢買嘢後，無幾耐佢搬走，仲提出想拎返啲用具走或者叫筆者出錢買埋佢果份，最後都搞咗一輪先解決到，所以最好連之後點處理夾份買嘅用具都傾好先，免去麻煩。
廁所廚房使用時間
如果有自己廁所就當然最好啦，但如果冇的話，連同廚房在內，入住前先大概了解室友們用廁所廚房嘅時間同習慣都係好事。朝早起身返工嘅時間爭分奪秒，你起身想去廁所時室友用緊仲要沖涼用好耐的話，真係企喺度！大家大概比個時間就一就，避免全部人同一個時間煮飯，沖涼等等，會令住flatshare嘅體驗好好多。
筆者嘅室友們通常都係六七點放工開始煮飯，我避免同佢地撞時間，通常都會放工先食小小嘢再去做運動，八點左右返到屋企先開始煮，省去麻煩。
帶朋友
自己租屋，特別係不與房東同住，最好就係自由度大，鍾意做乜都可以，得閒亦可以約下朋友返屋企食飯開Party。但上集都有提過，有部分人住屋真係只想休息，並唔想成日玩、Social。帶朋友返屋企玩甚至過前最好先同室友商討，確保室友同意先行動，互相尊重，亦可主動提出因而產生額外嘅錢（如bills）如何處理。
公共地方放物品
顧名思義，「公共」地方即係大家share用嘅地方，如廚房廁所、儲物室等，好多人（包括筆者）都曾經試過，覺得自己嘅野呢度放下果度放下冇所謂啦，反正個空間大家都可以用。但其實未必個個都係咁諗㗎，筆者就曾經有室友因為其他人放太多自己嘢喺廳，令到佢覺得活動空間小咗而唔開心；亦試過有另一個室友當廳係倉庫咁用，搞到行都行唔到，帶到麻煩比其他人，最後又係搞到大家唔開心，一鑊泡。
租約
嚟到技術性小小嘅題目，租約方面亦要注意，通常合租屋嚟講，有時會係一個人同房東簽約再分租比其他人咁，咁樣做其實相對上係冇保障，筆者建議合租時，全部人都放落合約同房東簽約（如果你係直接同房東/Agent租一間房就冇問題！），咁樣有啲咩突發事，如突然有室友要退租都可以跟返合約白紙黑紙做，減少煩惱。
筆者有朋友正正係遇到以上問題，同朋友夾租但貪方便合約只得一個名，點知佢朋友突然話要退租，不負責任一走了之，最後筆者朋友要硬食埋果份租直到自己搵到下一任租客為止！
總結
除咗以上各樣提過嘅嘢，其他比如公共空間點用點分配、規矩點定係冇對與錯，只有溝通後決定出嚟嘅係最適合你地，所以唔好覺得好多嘢「冇所謂啦」，「唔洗傾啦咁小事」，好多時候就係「小事」變成大事，令大家都住得唔開心就無謂啦！
